ناوه‌ڕۆك
دڵەکزەی ماوەی دووگیانی
یەکێک لە حاڵەتەکان لە ماوەی دووگیانیدا دڵەکزەیە، زۆرینەی خانمان لە ماوەی دووگیانیدا تووشی ئەم حاڵەتە دەبن، دڵەکزەی ماوەی دووگیانی هەمان دڵەکزەی کاتی ئاساییە و بەڵام بە هۆی دڵتێکچوون و ڕشانەوەی کاتی دووگیانیەوە ئەم حاڵەتە لە ماوەی دووگیانیدا قورستر و ناخۆشترە، دڵەکزە حاڵەتێکە کە تێیدا دەرچەی نێوان گەدە و سورێنچک دەکرێتەوە، هەر بۆیە ترشەڵۆکی گەدە و زراو لە گەدەوە دەڕۆن بۆ سورێنچک و ئەم ماددە بە هۆی ئەو ترشە بەهێزەوە دەبێتە هۆی هەستیاربوونی ناوپۆشی سورێنچک کە هەست بە سووتانەوە و کزە کزە دەکەیت لەسەر سنگت، وە دڵەکزە هیچ پەیوەندییەکی بە دڵەوە نییە.
هۆکارەکانی دڵەکزە لە خانمانی دووگیاندا
-
هۆڕمۆنەکان
کاتێک کە دووگیانیت جەستە پڕۆجیسترۆنی زۆر بەرهەم دەهێنێت، کە دەبێتە هۆی جیابوونەوەی گەدە و سورێنچک و ئیزن دەدات کە گەدە ترشەڵۆکی زیاتر بەرهەم بهێنێت.
-
گۆڕانکاری جەستەیی
گەورەبوون و گەشەکردنی منداڵدان دەتوانێت گۆڕانکاری بکات لە ئەندامەکانی تری جەستەدا و پەستان دەخاتە سەر گەدە و ڕیخۆڵە، تەنانەت دەتوانێت کە خواردن بگەڕێنێتەوە بۆ سورێنچک و نیشانەکانی دڵەکزە زیاتر بکات.
-
خۆراک
هەندێک خۆراک هۆکارن تاکوو دڵەکزە زیاتر بکات وەک خۆراکی تیژ و ترش.
-
درەنگ هەرسکردنی خۆراک
بە هۆی زیادبوونی ڕێژەی پڕۆجیسترۆنەوە و شلبوونەوەی ماسولکەکانی گەدە، هەرسکردنی خۆراکەکە کاتێکی زیاتری پێ دەچێت و زیاتر لە گەدەدا دەمێنێتەوە.
-
بەکارهێنانی دەرمان
بەکارهێنانی هەندێک دەرمان وەک دەرمانی دژە دڵتێکچوون لە ماوەی دووگیانیدا هۆکارێکە تاکوو دڵەکزە دروست ببێت.
-
زۆر خۆری
زۆر خۆری و خواردنی خۆراکی چەور و پڕ بەهارات هۆکارێکی دیکەیە
-
جگەرەکێشان
-
قەڵەوی
-
خواردنەوە کهولییەکان
جۆرەکانی دڵەکزە لە ماوەی دووگیانیدا
جۆرەکانی دڵەکزە لە ماوەی دووگیانیدا بە گشتی لەسەر بنەمای هۆکار و توندییەکەی دیاری دەکرێت، لە هەندێک لە خانماندا کەمە یاخود مامناوەندە و لە هەندێکیاندا ئەوەندە توندە کە دەبێتە هۆی نەمانی حەزی خواردن و نەخەوتن.
لە هەندێک لە خانماندا دڵەکزە لە سێ مانگی یەکەمی دووگیانیدا دەست پێ دەکات و لە سێ مانگی دووەمدا نامێنێت و لە سێ مانگی سێیەمدا خراپتر دەبێت، و هەندێک خانمی دیکە بە درێژایی ماوەی دووگیانیەکە ئازار دەچێژن بە هۆی دڵەکزەوە، هەندێک کات دڵەکزە نیشانەیەکە بۆ دووگیانی بۆیە ئاگاداربە.
نیشانەکانی دڵەکزە لە خانمانی دووگیاندا
- ئازاری سک، بە هۆی ئەوەی کە خانەکانی ڕیخۆڵە تووشی هەوکردن بوون به هۆی دڵەکزەوە ئازاری سک دروست دەبێت.
- قوتتدان، ئەگەر دڵەکزەکە گەشتۆتە ناوەڕاستی سورێنچک یاخود گەرووت، دەتوانێت کاریگەری بخاتە سەر خانەکانی گەروو و کرداری قوتتدان قورس بکات، هەروەها ئازاری گەرووشت بۆ زیاد دەکات.
- هەستکردن بە سووتانەوەی سەر سنگ و قوڕگ و ناو دەم
- تامی ترشێتی لە دەمدا
- بۆنی ناخۆشی دەم
- ئازارێک کە لە کاتی خەوتندا زیاتر دەبێت
- دڵتێکچوون و ڕشانەوە
- نزگەرە کردن
- خیرە خیزی سەر سنگ یان نیشانەکانی دیکەی ڕەبۆ
کاریگەرییە لاوەکییەکانی دڵەکزە لە ماوەی دووگیانیدا
- ئازاری بەردەوامی گەروو
- ئازاری بەردەوامی سەر سنگ
- گیرانی گەروو
- گۆڕانی دەنگ و گڕبوونی
- هەناسە توندی
- دابەزینی کێشی جەستە لەناکاو
- کەمبوونەوەی خڕۆکە سوورەکانی خوێن و کەمخوێنی
- کۆکەی بەردەوام
ڕێگریکردن لە توشبوون بە دڵەکزە لە ماوەی دووگیانیدا
زۆر خواردنەوەی ئاو
دەتوانیت پێش و پاش خواردن ئاو بخۆیتەوە، بەڵام هەرگیز لە ناوەڕاستی نان خواردندا ئاو مەخۆرەوە، کاتێک پێکەوە ئاو و خواردن دەچنە گەدەوە دەبیتە هۆی ئاوسانی گەدە و ئەمەش دەبێتە هۆی دڵەکزە
ژەمی سووک
لەگەڵ ئەوەی کە پێویستە ژەمی زیاتر بخۆیت لە ماوەی دووگیانیدا، بەڵام نابێت خواردنی زۆر بخۆیت چونکە گەدە بچووک بووەتەوە و توانای هەرسکردنی نییە، کە ئەمەش دەبێتە هۆی دڵەکزە، زوو زوو و ژەمی زۆر سوک و کەم بخۆ تاکوو گەدەت ئازاری پێ نەگات.
ژەمە خۆراکی تەندروست
خواردنی تەندروست بخۆ و دوورکەوە لە خواردنی بیبەر و ترشی و توونی و هەروەها خواردنە خێراکان، خواردنەوە گازدارەکان، هەموو جۆرەکانی خواردنە چەورەکان، هەموو جۆرەکانی سرکە و خواردنەوە کافایندارەکانیش.
خەوتنی تەندروست
دەبێت کەمەرت بەرزتر بێت لە سکت لە کاتی خەوتندا، کە ئەمە وادەکات ترشەڵۆکی گەدە لە شوێنی خۆیدا بمێنێتەوە و لە کاتی خەودا نەیەتەوە بۆ ناو سورێنچک و گەروو.
هێواش خواردن
هیچ پەلە مەکە لە کاتی نانخواردندا و بە جوانی پارووەکە بجوە بەمەش هەرسکردنی ئاسانتر دەبێت و تووشی دڵەکزە نابیت
لەبەرکردنی جلی فراوان
خانمانی دووگیان نابێت جلی تەنگ و تەسک لەبەربکەن بە تایبەت جلێک کە کەمەرەکەی زۆر تەسک بێت ئەمەش هۆکارێکی دیکەیە بۆ دڵەکزە.
ڕێک دانیشتن لە کاتی نان خواردندا
خۆت مەچەمێنەرەوە و بە جوانی دابنیشە لە کاتی نان خواردندا.
نان نەخواردن پێش خەوتن
هەوڵبدە کە سێ کاتژمێر پێش خەوتن هیچ نەخۆیت چونکە دڵەکزەت زیاد دەکات و خەویشت تێک دەچێت.
جگەرە نەکێشان
هۆکاری زۆر هەیە تاکوو لە ماوەی دووگیانیدا جگەرە نەکێشیت، یەکێک لەو هۆکارانەش دروستبوونی دڵەکزەیە.
چارەسەرکردنی دڵەکزه
- جوینی بنێشت دوای نان خواردن
- بەکارهێنانی دەرمانی سەر به گرووپی (Antacids)
- ئەگەر بەرزی فشاری خوێنت هەیە لە ماوەی دووگیانیدا پێویست دەکات کە دوورکەویتەوە لە بەکارهێنانی دەرمانی دڵەکزە
- ئەگەر لە ماوەی دووگیانیدا حەپی ئاسن دەخۆیت باشتر وایە کە دەرمانە (Antacid)ـکان دوو کاتژمێر دوای حەپی ئاسنەکە بخۆیت، واتە نێوانیان دوو کاتژمێر بێت.
