ناوه‌ڕۆك
پشکنینی گرانەتا چییە؟
گرانەتا (بە ئینگلیزی: Typhoid fever) نەخۆشییەکی بەکتریاییە کە دەتوانێت لە جەستەدا بڵاوببێتەوە و کاریگەری لەسەر زۆرێک لە ئەندامەکان دروست دەکات. ئەگەربێتوو چارەسەر نەکرێت، کاریگەری لاوەکی مەترسیدار و تەنانەت مردنیشی لێ دەکەوێتەوە.
ئەم نەخۆشییە بەهۆی بەکتریایەکەوە دروست دەبێت کە پێی دەوترێت (سالمۆنێلای تایفی)، پشکنینەکە بەدوای دژەتەنی ئەم بەکتریایەدا دەگەڕێت لە خوێنی کەسی تووشبوودا.
ناوەکانی پشکنینەکە
• Typhoid fever test
• Widal test
نیشانەکانی گرانەتا
• بەرزبوونەوەی بەردەوامی پلەی گەرمی
• ژانەسەر
• ئازاری گەدە
• شەکەتی
• قەبزی یان سکچوون
• ئازاری ماسوولکە
• ئارەقکردنەوە
• کۆکەی وشک
پشکنینەکە چۆن ئەنجام دەدرێت؟
کارمەندی تاقیگە لەڕێگەی سرنجێکەوە نموونەیەکی خوێن لە دەماری قۆڵی نەخۆش وەردەگرێت، دواتر نموونەکە دەخرێتە تیووبی تایبەتەوە و پشکنینەکەی پێ ئەنجام دەدرێت.
ئەنجامەکانی پشکنینەکە چیمان پێ دەڵێت؟
پشکنینی گرانەتا ئەنجام تەنیا بە ئەرێ (Positive) یان نەرێ (Negative) دەدات بەدەستەوە. ئەرێ بە واتای هەبوون و نەرێ بە واتای نەبوونی نەخۆشییەکە دێت.
