قەڵەوی تەمەنی مرۆڤ بە نزیكەی سێ ساڵ كەم دەكاتەوە
توێژینەوە نوێكان دەریانخستوە كە تووشبوون بە قەڵەوی ھەڕەشەیەكی گەورە لەسەر تەندروستی مرۆڤ دروست دەكات و كاریگەریەكانیشی لە داھاتوودا لەسەر مرۆڤ دەردەكەوێت.
توێژەران و پزیشكانيش ھۆشدارییان داوە لەوەی كێشی زیادە تەمەنی مرۆڤ بە نزیكەی ساڵێك كەم دەكاتەوە، لكاتێكدا قەڵەوی تەمەنی مرۆڤ بە نزیكەی سێ ساڵ كەمدەكاتەوە، ئەوەش بە بەراورد بەو كەسانەی كە كێشێكی مامناوەند و ئاساییان ھەیە.
وێڕای ئەوەش قەڵەوی ئەگەرەكانی توشبوون بە نەخۆشییەكانی دڵ و جەڵتەی دەماغ و شێرپەنجە زیاتر دەكات.
بەپێی ئامارەكانی ڕێكخراوی تەندروستی جیھانیش، لەسەدا پانزەی ژنان و لەسەدا یانزەی پیاوان لە جیھاندا ڕوبەڕووی قەڵەوی بونەتەوە، ھاوكات یەك ملیار كەسی پێگەیشتوو لە جیھاندا بە دەست كێشی زیادەوە دەناڵێنن و شەش سەد ملیۆن كەسیش بەدەست قەڵەویەوە دەناڵێنن كە بەھۆكاری سەرەكیش بۆ گیان لەدەستدانی پێشوەخت دادەنرێت.