ناوه‌ڕۆك
سەرەتا
سووتانی پلە سێ بە سووتانێکی توند و مەترسیدار ناسراوە، پێست پێکهاتووە لە سێ چین، لە سووتانی پلە سێدا هەر سێ چینەکەی پێست دەسوتێن و زیانیش دەگات بە ماسولکە و ئێسکەکانیش، هەروەها سووتانی پلە سێ خراپترین و مەترسیدارترین جۆری سووتانە، لە سووتانی پلە سێدا نەخۆشەکە هیچ ئازارێکی نییە چونکە هەستە دەمارەکانی دەسوتێت و نامێنێت.
هۆکارەکانی سووتانی پلە سێ
- ڕۆنی داخ.
- گریس.
- ماددەی کیمیایی وەک بەنزین و چیمەنتۆ و ماددە پاککەرەوەکان.
- کارەبا.
- شلەمەنی زۆر گەرم.
- ئاگر.
نیشانەکانی سووتانی پلە سێ
- دەکرێت ڕەنگی پێستەکە بگۆڕرێت بۆ، سپی، ڕەش، قاوەیی، چەرمی.
- پێستەکە وشک دەبێتەوە.
- هەڵئاوسان.
- نەبوونی ئازار.
پزیشک لەسەر بنەمای ئەم چەند خاڵە چارەسەر دادەنێت بۆ نەخۆشەکە
- تەمەنی نەخۆشەکە.
- بوونی هەر نەخۆشییەکی دیکە.
- پێشینەی خێزان.
- بڕی سووتانەکە.
- شوێنی سووتانەکە.
- هۆکاری سووتانەکە.
- بەرگەگرتنی نەخۆشەکە بۆ چارەسەرەکان.
چارەسەری سووتانی پلە سێ
- پاککردنەوە و لابردنی پێستە مردوو و سووتاوەکان کە ئەم ڕێگایە دەکرێت نەخۆشەکە بخەنە ناو ئاو و دەرمان و پێستە مردووەکەی هەمووی لێبکەنەوە و یاخود دەکرێت بە نەشتەرگەری ئەنجام بدرێت.
- دانانی موغەزی بۆ نەخۆشەکە لە ڕێگەی کانۆلاوە.
- ئەگەر هات و نەخۆشەکە تووشی هەوکردن بووبێت ئەوا دەرمانی دژەبەکتریاشی بۆ دادەنرێت بە شێوەی دەرزی و لەگەڵ موغەزیەکاندا پێی دەدرێت.
- پاد و کرێمی دژەهەوکردن بۆ سەر برینی سووتاویەکە.
- خۆراکی تەندروست و پڕ شلەمەنی.
- پێدانی ڤاکسینی گەزاز.
- نەشتەرگەری چاندنی پێست.
چارەسەری سروشتی
دوای چاکبوونەوەی نەخۆش لە سووتاوی ئەگەری زۆرە کە پێویستی بە چارەسەرکارێکی سرووشتی هەبێت، چونکە بە هۆی ئەوەی سووتانی پلە سێ زۆر قووڵە ئێسک و ماسولکەکان زیانیان پێ دەگات و کەسەکە ناتوانێت وەک پێشتر جەستەی بە باشی بجوڵێنێت، بۆیە پێویستە کە چارەسەری سرووشتی بۆ بکرێت و ڕێنمایی و وەرزشی تایبەتی بۆ دابنرێت تاکوو ئێسک و ماسولکەکانی بگەڕێنەوە باری ئاسایی.
چاودێری کردنی سووتانی پلە سێ
- پێویستە هەموو ڕۆژێک تەداوی شوێنی سووتاویەکە بکەیت، دەستت جوان بە ئاو و سابوون بشۆ و لەفافە کۆنەکە لێبکەرەوە، پێش لێکردنەوەی لەفافەکان بە ئاو تەڕ بکە و بیخوسێنە تاکوو برینەکە لێنەبێتەوە بە وشکی کاتێک لەفافەکە لێدەکەیتەوە.
- شوێنی سووتانەکە بە جوانی تەداوی بکە و بە ئاو و سابوون تەداوی بکە و پاکی بکەرەوە و دواتر بە هێواشی وشکی بکەرەوە، بە باشی سەرنجی سووتانەکە بدە تاکوو دڵنیابیت لە بوونی هەر گۆڕانکارییەک وەک ئاوسان و سووربوونەوەی زۆر و هەرگیز برینەکە هەڵمەکەنە چونکە لەوانەیە تووشی خوێنبەربوون ببێت و پیس ببێت و تووشی هەوکردن ببێت.
- ئەو کرێمەی کە پزیشک بۆی داناویت بیدە لە شوێنی سووتاویەکە و لەفافی نوێی لێبدە.
- بە توندی لەفافەکە مەبەستە چونکە دەبێتە هۆی هەڵئاوسان و خوێنبەربوونی برینەکە.
- شوێنی سووتانەکە بەرزتر لە ئاستی دڵ ڕابگرە ئەمە یارمەتیدەرە تاکوو هەڵئاوسانەکەی کەم ببێتەوە.
چ کاتێک دەبێت سەردانی پزیشک بکەیت؟
- بوونی دڵەکوتە و هەناسەتوندی.
- میز نەکردن.
- هەبوونی تا.
- سووربوونەوە و ئاوسان کە ڕۆژ بە ڕۆژ زیاتر بکات.
- دەردراوی بۆن ناخۆش کە لە شوێنی سووتاویەکەوە بێتە دەرەوە.
- دەم یان چاوت وشک ببێتەوە.
- زیاد لە پێویست تینوو و ماندووبیت.
- میزی تۆخ.
- سەرئێشە و سەرگێژخواردن.
سەرچاوەکان
412 بینین
